Home eBooks Index eBooks by Author Glossary Search eBooks

Minstrelsy of the Scottish Borders

The following is from the Minstrelsy of the Scottish Borders by Sir Walter Scott:

Sir Patrick Spens

Introduction - Notes

The king sits in Dumfermline town,
Drinking the blude-red wine;
"O[77] whare will I get a skeely skippe[78],
"To sail this new ship of mine?"

O up and spake an eldern knight,
Sat at the king's right knee,--
"Sir Patrick Spens is the best sailor,
"That ever sail'd the sea."

Our king has written a braid letter.
And seal'd it with his hand,
And sent it to Sir Patrick Spens,
Was walking on the strand.

"To Noroway, to Noroway,
"To Noroway o'er the faem;
"The king's daughter of Noroway,
"'Tis thou maun bring her hame."

The first word that Sir Patrick read,
Sae loud loud laughed he;
The neist word that Sir Patrick read,
The tear blinded his e'e.

"O wha is this has done this deed,
"And tauld the king o' me,
"To send us out, at this time of the year,
"To sail upon the sea?

"Be it wind, be it weet, be it hail, be it sleet,
"Our ship must sail the faem;
"The king's daughter of Noroway,
"'Tis we must fetch her hame,"

They hoysed their sails on Monenday morn,
Wi' a' the speed they may;
They hae landed in Noroway,
Upon a Wodensday.

They hadna been a week, a week,
In Noroway, but twae,
When that the lords o' Noroway
Began aloud to say,--

"Ye Scottishmen spend a' our king's goud,
"And a' our queenis fee."
"Ye lie, ye lie, ye liars loud!
"Fu' loud I hear ye lie."

"For I brought as much white monie,
"As gane[79] my men and me,
"And I brought a half-fou[80] o' gude red goud,
"Out o'er the sea wi' me."

"Make ready, make ready, my merrymen a'!
"Our gude ship sails the morn."
"Now, ever alake, my master dear,
"I fear a deadly storm!

"I saw the new moon, late yestreen,
"Wi' the auld moon in her arm;
"And if we gang to sea, master,
"I fear we'll come to harm."

They hadna sailed a league, a league,
A league but barely three,
When the lift grew dark, and the wind blew loud,
And gurly grew the sea.

The ankers brak, and the topmasts lap,[81]
It was sik a deadly storm;
And the waves came o'er the broken ship,
Till a' her sides were torn.

"O where will I get a gude sailor,
"To take my helm in hand,
"Till I get up to the tall top-mast,
"To see if I can spy land?"

"O here am I, a sailor gude,
"To take the helm in hand,
"Till you go up to the tall top-mast;
"But I fear you'll ne'er spy land."

He hadna' gane a step, a step,
A step, but barely ane,
When a bout flew out of our goodly ship,
And the salt sea it came in.

"Gae, fetch a web o' the silken claith,
"Another o' the twine,
"And wap them into our ship's side,
"And let na the sea come in."

They fetched a web o' the silken claith,
Another of the twine,
And they wapped them round that gude ship's side,
But still the sea came in.

O laith, laith, were our gude Scots lords
To weet their cork-heel'd shoon!
But lang or a' the play was play'd,
They wat their hats aboon.

And mony was the feather-bed,
That flattered[82] on the faem;
And mony was the gude lord's son,
That never mair cam hame.

The ladyes wrang their fingers white,
The maidens tore their hair,
A' for the sake of their true loves;
For them they'll see na mair.

O lang, lang, may the ladyes sit,
Wi' their fans into their hand,
Before they see Sir Patrick Spens
Come sailing to the strand!

And lang, lang, may the maidens sit,
Wi' their goud kaims in their hair,
A' waiting for their ain dear loves!
For them they'll see na mair.

O forty miles off Aberdeen,
'Tis fifty fathom deep,
And there lies gude Sir Patrick Spens,
Wi' the Scots lords at his feet.

[Footnote 77: In singing, the interjection, O, is added to the second and fourth lines.]
[Footnote 78: Skeely skipper--Skilful mariner.]
[Footnote 79: Gane--Suffice.]
[Footnote 80: Half-fou--the eighth part of a peck.]
[Footnote 81: Lap--Sprang.]
[Footnote 82: Flattered--Fluttered, or rather floated, on the foam.]

Auld Maitland


Copyright Scotland from the Roadside 2019